ილია ჭავჭავაძის სახელობის ევროპული კვლევებისა და სამოქალაქო განათლების ცენტრმა ილიას სახელმწიფო უნივერსიტეტთან ურთიერთთანამშრომლობის მემორანდუმი გააფორმა.
მხარეები შეთანხმდნენ, რომ ითანამშრომლებენ სხვადასხვა აქტუალურ საკითხზე, კერძოდ, გამართავენ სამუშაო შეხვედრებს, სემინარებს, კონფერენციებს; განახორციელებენ კვლევით და სასწავლო-საგანმანათლებლო პროექტებს; ხელს შეუწყობენ მათ მიერ ორგანიზებულ პროგრამებსა და პროექტებში პროფესორების, ექსპერტებისა და სტუდენტების ჩართვას; მოამზადებენ ერთობლივ პუბლიკაციებს; მხარს დაუჭერენ თანამშრომლების პროფესიულ მომზადებასა და კვალიფიკაციის ამაღლებას და ანალიტიკურ საქმიანობაში უნივერსიტეტისა და აკადემიის წარმომადგენლების ჩართვას; ასევე, საკუთარი კომპეტენციის ფარგლებში, ჩაერთვებიან ერთობლივი სასწავლო პროგრამების და მასალების შემუშავების პროცესში.
„ვიმედოვნებთ, ილიას სახელმწიფო უნივერსიტეტთან ჩვენი ცენტრის თანამშრომლობა მრავალმხრივ სასარგებლო და ნაყოფიერი იქნება, მათ შორის, სტუდენტების სტაჟირება-დასაქმებისა და პროფესიული განვითარებისთვის აუცილებელი გარემოს გაუმჯობესების თვალსაზრისით,“ - განაცხადა ილია ჭავჭავაძის ცენტრის დირექტორმა, ნინო კალანდაძემ.
ილია ჭავჭავაძის ცენტრს თანამშრომლობის მემორანდუმები ასევე გაფორმებული აქვს ივანე ჯავახიშვილის სახელობის თბილისის სახელმწიფო უნივერსიტეტთან და კავკასიის უნივერსიტეტთან.
